Towards Our Sivana

9 t'Awwissu 2010: Minn Addis għal Bahir Dar

2010-09-20T20:11:00.003+02:00

Fit-3am tat-Tnejn 9 t'Awwissu rfisna għall-ewwel darba fuq l-art Etjopjana. F'dak il-ħin ta' filgħodu ftit li xejn kien hemm nies, l-ajruport kien kwiet u għaddejna l-bagalji mingħajr problemi ta' xejn. Iżda mbagħad inħsadna meta ndunajna li l-bagalja ta' Amanda ma kinetx waslet! Diżappuntati li x-xorti ħażina kellha tmiss lil waħda minna ftaħna l-claim bit-tama li ma ddumx ma tasal il-bagalja wara ftit jiem possibli. Iżda hekk kif konna ħa noħorġu mill-ajruport iż-żewġ Manwelijiet tal-grupp jindunaw li bagalja tixbah lil ta' Amanda kienet qegħda għand waħda mara. Meta morna fuqha biex niċċekjaw rajna li l-bagalja vera kienet bħal ta' Amanda, ppruvajna ċ-ċavetta fil-katnazz u nfetħet. Ħadna r-ruħ li l-bagalji kollha kienu waslu u b'hekk irnexxilna nevitaw l-ewwel diżavventura tal-esperjenza b'wiċċ il-ġid.
Ftit wara lmaħna lix-xufier tal-vann li kellu jwassalna minn Addis għal Bahir Dar. u b'hekk għabbejna l-bagalji fuq il-vann biex nibdew dan il-vjaġġ twil ta' madwar 12-il siegħa biex naslu fl-ewwel post li fih kellna nibdew il-missjoni tagħna. F'dak il-ħin kmieni ta' filgħodu stajt ninnota ftit affarijiet fuq il-belt ta' Addis Abeba.

LURA MALTA - L-1 parti tar-rakkont

2010-09-15T17:44:00.002+02:00

Għaddiet ġimgħa minn meta wasalna lura Malta u dak li taħseb li tkun għaddejt minnu fix-xahar li għamilt l-Etjopja tibda tirrealizza ftit aktar x’kien, fejn kont u x’esperjenza għamilt. Wara ġimgħa xorta nħoss li għadu m’għaddiex biżżejjed żmien biex nifhem eżatt l-esperjenza f’dak kollu li tista toffri. Iżda bdejt nirrealizza xi affarijiet u naħseb li kelli bżonn li nkun lura hawn Malta biex nibda nirrealizzahom.

Ħaġa li żgur fhimt, anke meta kont l-Etjopja stess, kienet kemm ma konna fhimna xejn fuq l-Etjopja u n-nies tagħha. Tant hija kumplessa, kemm bħala pajjiż kif ukoll is-sitwazzjoni li hemm li f’xahar tkun bdejt tifhem farka biss minna...jew aħjar minn hekk tkun għadek bdejt tifhem kemm għadek ma fhimt xejn. Ħaġa oħra li nista’ ngħid minn issa hija li aktar minn qatt qabel napprezza l-kumdità u x-xorti li għandna f’pajjiżna. Għalkemm mhux kollox ward u zahar iżda żgur li l-pajjiż tagħna joffri livell ta’ ħajja eċċezzjonali.

Kif kont wegħdt qabel, kull tant żmien ħa nibda ntella’ ġranet mill-esperjenzi tagħna li ktibt meta kont l-Etjopja, f'dan il-blogg. Ħa nikteb l-emozzjonijiet li ħassejna dakinhar li konna qed ngħaddu minnhom iżda ukoll ħa nikteb kif qed inħares lejhom illum li nista’ nixtarrhom bil-kwiet. Dan ħa nagħmlu bl-għan li tibqa’ tifkira ta’ dak li għaddejna minnu, biex dawk kollha li urew interess fl-esperjenza tagħna jkunu jafu kif kienet u kif ukoll biex ngħin lili nnifsi nifhem aktar din l-esperjenza. Nittama li sa ma nasal sal-aħħar ġurnata tal-esperjenza jkolli idea aktar ċara ta' x'fissret din l-esperjenza.

Il-Ħadd 8 t’Awwissu 2010 - Tluq minn Malta
Il-ġurnata tant mistennija kienet waslet. Il-jum li naqbdu l-ajruplan biex nibdew l-esperjenza tagħna fl-Etjopja kien magħna. L-aħħar ġimgħa kienet waħda t’eċitament għalija u ta' ħafna ħsibijiet. Jekk matul is-sena qatt ma kelli dubju minn dak li kont ħa nagħmel, f’din l-aħħar ġimgħa kull dubju li jeżisti beda jiġi f’moħħi. Kelli dubju fuq jekk ħadtx il-ħwejjeġ adattati għal din l-esperjenza, kif ħa nippakja l-mediċina u nqiegħed kollox fil-bagalja, jekk hux ħa jkollna problemi biex ngħadduhom mill-ajruport t’Addis, kif ħa nissaporti fil-vjaġġ twil li għandna, il-mard li ħa nkun qed niffaċja, l-grupp li ħa nkun miegħu, n-nies kif ħa jilqgħuna u mitt ħaġa oħra. F’moħħi ġiet stampa tar-rivista Missionworld li kienu jqassmulna fl-iskola primarja. Din ir-rivista, bil-format tagħha, bil-karti li tuża u b’dak kollu li kienet magħmula kienet tfakkrek fil-faqar. U l-istampi li kien ikolla fuq l-Afrika, kollha kienu jkunu ta’ nixfa kbira, tfal għarwenin b’żaqqhom minfuħa, wiċċhom miksi dubbien ħdejn djar magħmula mill-pjanċi. Ma stajtx ma nsaqsiex jekk din l-istampa li baqgħet ittimbrata f’moħħi hijiex ir-realtà li ħa nkun qed nara u x’irrid nagħmel jiena f’din is-sitwazzjoni.

Iżda wara li ltqajt ma’ membri oħra tal-grupp u ndunajt li kollha għaddejjin mill-istess emozzjonijiet ikkalmajt xi daqsxejn...sakemm ma wasal il-Ħadd filgħodu għaliex reġa’ beda l-eċitament. Kelli seba’ mitt sena biex inkun l-ajruport u ngħaddi l-bagalja miċ-check-in. Fis-2.30pm kont qiegħed l-ajruport u hemm sibna ħafna minn sħabna li ġew biex isellmulna. Ħadt ħafna gost x’ħin rajthom u apprezzajt ħafna dan il-ġest li qagħdu jiġu l-ajruport. Iċ-check-in sar mingħajr problemi u fil-4.45pm tlaqna minn Malta permezz tal-Egypt Air.

Kellna titjira tajba u malli nżilna fl-ajruport tal-Eġittu mal-ewwel ħassejt li m’għadniex f’ambjent Ewropej. Bid-deżert li jdawwar l-ajruport tal-Kajr u l-ħwejjeġ li kienu lebsin ħafna minn nies li kienu qed jużaw l-ajruport ma stajtx ma tindunax li qiegħed f’kultura differenti.

Fl-ajruport inzertajna ukoll grupp ta’ Musulmani lebsin ilbiex twil abjad li naħseb li kienu sejrin Mekka għar-Ramadan. Għalkemm f’Malta nsibu nies b’din il-kultura, kienet l-ewwel darba għalija li kont f’pajjiż fejn din hija l-kultura ewlenija.

Fil-11pm, għajjenin u bi ngħas qbadna ajruplan Egypt Air għal Addis Ababa. Din probabilment kienet ħa tkun l-aħħar darba li stajt nagħmel kuntatt bil-mowbajl ma’ Malta għax kif qalulna qabel ir-reception fl-Etjopja hija problema. Din kienet it-tieni parti tal-vjaġġ minn 3 għax wara l-vjaġġ minn Malta għall-Kajr u mill-Kajr għall-Addis Ababa kien jonqosna madwar 12-il siegħa vjaġġ bil-vann minn Addis għal Baħir Dar.

Fil-vjaġġ mill-Kajr għall-Addis kien hemm xi ftit ta’ turbolenzi u anke nqbadna f'maltemapata bis-sajjetti u ħafna minna batew b’widnejjhom u jien affetwatni ukoll il-fatt li kelli xi ftit ta’ Sinus. Madwar 4 siegħat wara kellna nkunu f'Addis.

Wasal iż-żmien!

2010-08-01T10:12:00.017+02:00

Bħal daż-żmien sena kien beda jberren il-ħsieb biex nagħmlu esperjenza ta' volontarjat f'pajjiż fil-kontinent Afrikan. Illum ninsabu ġimgħa biss il-bogħod mill-ġurnata li fiha naqbdu l-ajruplan biex nibdew l-esperjenza tagħna fl-Etjopja.

Għalkemm l-esperjenza fiha nfisha ħa tibda l-ġimgħa d-dieħla, nistgħu ngħidu li din is-sena li għaddiet kienet kollha kemm hi parti mill-esperjenza li fiha kbirna flimkien bħala grupp u esperjenzajna emozzjonijiet u esperjenzi ta' nies oħra li għinu fl-iżvilupp tagħna.

Matul dan iż-żmien iltqajna ma' nies li ħadu interess fl-esperjenza li ħa nagħmlu, offrew l-għajnuna tagħhom b'sinċerità kbira mingħajr qatt ma stennew xejn lura. Il-ġenerożità ta' dawn in-nies ħalliet effett kbir fuqi fejn imdawwrin b'ħafna kummenti negattivi fuq id-dinja li ngħixu fiha llum, żgur li dawn in-nies ikkontradixxew dawn il-kummenti. Hawnhekk ma nistax ma nirringrazzjax lil ħafna nies differenti li għinuna b'xi mod jew ieħor: dawk li offrew l-għajnuna fiżika għax ħadmu magħna, dawk li offrewlna l-faċilitajiet tagħhom, dawk li offrewlna għajnuna finanzjarja u dawk li sponsorjawna. Mill-ġdid GRAZZI MILL-QALB

Wara li għamilna l-aħħar attività ta' ġbir ta' fondi, komplejna għaddejin b'laqgħat ta' preparazzjoni. Wieħed mit-testijiet importanti kien meta fl-aħħar ta' Ġunju għamilna ġimgħa ngħixu flimkien. Din kienet esperjenza importanti biex nibdew nidraw aħjar il-karattri ta' xulxin peress li ħa nkunu qed niġu wiċċ imb wiċċ għal xahar sħiħ fl-Etjopja. Żgur li xahar f'pajjiż b'kultura u ambjent differenti minn tagħna u l-esperjenzi li ħafna nies qalulna li ħa niltaqgħu magħhom jistgħu jħallu effett psikoloġiku fuqna. Għalhekk tajjeb li nkunu preparati biex kemm jista' jkun innaqqsu minn problemi li jistgħu jinqalgħu. Hawnhekk iddiskutejna ħafna sitwazzjonijiet li nistgħu niltaqgħu magħhom fl-Etjopja u kif għandna niffaċċjawhom; hekk per eżempju Etjopjani li jitolbuna għajnuna personali għandna nagħtuhilhom jew niddiskutuha mal-grupp u mas-sorijiet li ħa nkunu qed noqgħodu għandhom u li jafu n-nies tal-post aħjar minnna? Fhimna li għandna nikkontrollaw l-emozzjonijiet tagħna u nevitaw għajnuna b'mod personali għax b'din jigwadanjaw biss l-istess nies li jafu jagħmlu wiċċhom kif ukoll tħalli lil dawn in-nies tallaba iktar milli jgħinu lilhom infushom. Għalhekk l-għajnuna ssir bis-sorijiet bħala intermedjarji biex l-għajnuna żgur tmur għand min għandu bżonn u mqassma bejn kulħadd u kif għandha tkun. Komplejna ukoll nieħdu l-aħħar tilqim tagħna kontra r-risku tal-mard u kellimna spiżjar li għamel din l-esperjenza fil-passat kif għandna nieħdu ħsieb saħħitna u l-iġjene tagħna f'dan il-pajjiż. Irridu noqgħodu attenti min-nemus tal-malarja, nisprejjaw ta' spiss u norqdu bil-mosquito nets, kif ukoll ma noqgħodux ħafjin minħabba l-jiggers li jidħlu fis-saqajn. Dan barra milli ma jaqbilx li nixorbu mill-ilma tal-post ħlief minn fliexken issiġġillati.

Barra din il-preparazzjoni, ppreparajna ukoll xi tagħlim tal-Ingliż li ħa nkunu qed nagħmlu fil-parti ta' filgħodu tal-ġurnata. Differenti minn ħafna pajjiżi fid-dinja, hemm għatx kbir għat-tagħlim u mill-esperjenza ta' min mar qabilna qalulna li jkun hemm kju sħiħ jistenna li tiftaħ l-iskola. Wara nofsinhar ħa nkunu qed immorru l-postijiet li jissuġġerulna li għandna mmorru s-sorijiet jew patrijiet li ħa nkunu magħhom u naraw ukoll kif għaddejin il-proġetti li bdew fis-snin ta' qabel u x'jista' jsir ġdid. Barra minn hekk aħna dejjem ħa nkunu lesti biex nadattaw skont il-bżonn li jinqala.

Il-komunikazzjoni ma' Malta ħa tkun waħda diffiċli. Il-linja tal-mowbajl ħafna drabi mhuwiex ħa jaqbad u biex inċemplu minn linja fissa rridu mmorru f'post għal tal-apposta li l-ewwel jagħmel kuntatt mal-kapitali u forsi jgħaddu xi 2 jew 3 telefonati biss.

Sfortunatament Ann u Melanie, għal raġunijiet personali ma setgħux ikomplu l-esperjenza. Grazzi tal-esperjenza li qsamtu magħna u awguri għall-futur. Minflokhom ingħaqdet magħna Michelle mill-grupp Living Waters li diġà telgħet l-Etjopja qabel u għalhekk l-esperjenza li diġà għandha żgur ħa tkun ta' benefiċċju għall-grupp.

Fl-aħħar laqgħa tagħna beda jinħass xi ftit l-eċitament tal-aħħar għal xi wħud filwaqt li oħrajn l-emozzjonijiet għadhom ħa jibdew jinħassu. Żgur li din il-ġimgħa f'moħħna għandna biss ħsieb wieħed: iġri jasal is-14.30 ta' nhar il-Ħadd li ġej 8 t'Awwissu biex inkunu l-ajruport ħalli dak li ilna nippreparaw għalih nibdew inwettquh.

Dan ħa jkun l-aħħar artiklu tiegħi qabel ma' nitilqu lejn l-Etjopja. Meta niġu lura nittama li nsib l-opportunità li naqsam magħkom dak kollu li nkunu għaddejna minnu f'dan ix-xahar.

Saħħa u s-sliem

Henry

(Ritratti Etjopja meħuda minn http://www.missjonietijopja.com/index.html)

IL-KALENDARJU TAGĦNA

8 t'Awwissu: L-Ajruport Internazzjonali ta' Malta fis-2.30pm biex naqbdu t-titjira tal-3.45pm.

9 t'Awwissu: Wara li nbiddlu l-ajruplan fil-Kajr naslu Addis Ababa fit-3am. Nitilqu b'vann għal vjaġġ ta' madwar 12-il siegħa lejn Baħir Dar fejn ħa nagħmlu l-ewwel volontarjat.

16 t'Awwissu: Immorru Pawe fejn ħa jsir volontarjat fit-tieni post

25 ta' Settembru: Immorru Mandura: it-tielet post ta' volontarjat tagħna

3 ta' Settembru: Lura Baħir Dar

6 ta' Settembru: Nitilqu minn Baħir Dar għal Addis Ababa

9 ta' Settembru: Titjira minn Addis Ababa fl-4am. Inbiddlu l-ajruplan fil-Kajr u naslu lura Malta fl-4pm.

Ritratti

2010-05-07T19:56:00.009+02:00

Ritratti tat-tournament tal-futbol li sar il-Ħadd 2 ta' Mejju fil-grawnds tal-iskola f'Tal-Ħandaq. Grazzi lil dawk kollha li pparteċipaw biex għamlu din il-ġurnata suċċess.

Fit-8 u d-9 t'April fil-Liċeo tas-subien San Tumas More fil-Ħamrun saru jumejn attivitajiet fejn l-istudenti ta' din l-iskola ħadu sehem f'Bungee Run, Gladiator u Human Table Soccer biex jgħinuna niġbru aktar flus għal ħidma tagħna fl-Etjopja is-Sajf li ġej. Dan l-apparat ġie ġentilment mogħti lina minn JUGS. Grazzi lill-istudenti u lill-għalliema kollha tal-għajnuna tagħhom speċjalment lil Mario Camilleri li ħadem ħafna għal dawk il-jumejn.

Football tournament

2010-04-28T16:00:00.005+02:00

Agħfas fuq il-poster t'hawn taħt biex tkun taf id-dettalji fuq it-tournament tal-futbol li ħa jiġi organizzat nhar il-Ħadd 2 ta' Mejju fl-iskola tal-Ħandaq.

Jekk qed titħajjar tieħu sehem agħfas fuq il-formola tar-reġistrazzjoni għat-tim tiegħek u aqra u ffirma r-regoli t'hawn taħt. Agħġġel għax il-postijiet huma limitati!

Maratona t'24 siegħa suċċess

2010-04-25T15:59:00.007+02:00

Grazzi lil dawk kollha li ħadu sehem f'din il-maratona, f'xi ħin jew ieħor u b'hekk setgħet tkun suċċess. L-akbar grazzi tmur għat-tliet persuni li baqgħu jimxu sa l-aħħar, Lara Gerada, atleta Maltija, Brandon Pace, il-moħħ wara din il-maratona kollha, u Richard Camilleri. Ritratti mill-maratona.

Mixja t'24 siegħa għall-Etjopja

2010-04-04T10:06:00.006+02:00

Kif forsi diġà smajtu qed tiġi organizzata Mixja t’24 siegħa nhar is-Sibt 24 t’April 2010 biex niġbru aktar flus għall-familji fl-Etjopja. L-organizzazzjoni għal din il-mixja għaddejja b’ritmu mgħaġġel u diġà kellna rispons tajjeb għalkemm l-għan jibqa’ li niġbru ammont ta’ flus mhux ħażin biex inkunu nistgħu nagħmlu d-differenza.

Għalhekk hemm tlett min-nies li ħa jippruvaw jagħmlu l-mixja kollha ta’ 24 siegħa madwar Malta; Lara Gerada, atleta Maltija, Brandon Pace, il-moħħ wara din il-maratona kollha, u Richard Camilleri. Intom ukoll tistgħu tingħaqdu magħhom!

Il-mixja tibda fil-11am ħdejn l-ITS San Ġiljan u tispiċċa 24 siegħa wara. Fuq facebook ħa jkun hemm aġġornamenti fuq fejn tkun waslet il-mixja kull 30 minuta. Anke jekk tingħaqdu magħna filgħaxija, nagħtukom tejp li jleqq biex tweħħlu ma’ ħwejjiġkom, għalkemm jekk tiġu lebsin ħwejjeġ li diġà jleqqu jew ħwejjeġ bojod ikun ħafna aħjar.

B’daqxejn ta’ donazzjoni tista’ tkun parti minn din il-mixja. Billi tagħti donazzjoni ta’ 5 Ewro (jew iktar jekk trid!) nibagħtulek irċevuta u sticker. Poġġi l-isticker fuq ħwejġek fil-ħin li tiddeċiedi li ħa tingħaqad magħna f’din il-mixja.

Biex tagħti d-donazzjoni u tieħu l-isticker tiegħek ikkuntatja lil Brandon fuq 99467745, Allison 99256550 jew Natalie fuq 99834546 jew permezz tal-e-mail tosivana2010@gmail.com. Niġu nagħtuk l-irċevuta jew ninpostawilek kif tippreferi.

Għinna ukoll billi tmexxi l-kelma ma’ sħabek u dawk kollha li taħseb li jkunu interessati.

Nisperaw li narawkom għal din il-mixja, għal ftit siegħat jew għal ftit minuti, jew ejja u żommilna kumpanija. Billi tagħti ftit tkun qed tagħti ħafna lill-oħrajn.

Żomm ruħek aġġornat permezz ta’ dawn il-links: Facebook Group jew Website

Grazzi

Lesti l-Figolli....xi jmiss?

2010-03-11T16:07:00.009+01:00

Madwar 900 figolla maħdumin fit-3 ijiem u mibjugħin f’4 ijiem.

Din kienet l-esperjenza tagħna tal-figolli. Għal darba oħra ma nistax ma nikkumentax fuq il-fatt li sibna tant nies ta’ qalb tajba lesti li jgħinuna. Irridu nirringrazzjaw lid-Dolceria Primavera li ħadu ħafna paċenzja bina, fejn ħallewna nużaw il-makkinarji tagħhom kif ukoll għamlulna l-għaġina u ħawdulna l-intrita. Saħansitra offrew li jaħmulna numru ta’ figolli. Ukoll wara reġgħu għamlulna 200 figolla oħra biex inlaħħqu man-numru kbir ta' nies li ordnaw il-figolli minn għandna.

Irridu nirringrazzjaw lil sponsors li provdewlna ċertu ingredjenti b’xejn bħal Giormina għad-dqiq u z-zokkor, l-Lamb Brand għall-icing sugar, Ta' Ganza u Anthony Busuttil Ltd għaz-zokkor u fran f'Birkirkara u Ħal Balzan li ħmewlna l-figolli.

Sehem kbir tahulna n-nies tal-każin Għaqda Mużikali Sant' Elena Birkirkara (magħrufa bħala tal-Bagri) li ħallewna nużaw is-sala tal-każin biex naħdmu l-figolli fihom, sabulna forn fil-viċin biex naħmuhom fihom u ħafna nies mill-każin li qattgħu ħin twil magħna jaħdmu l-figolli.

Is-Sibt 27 u l-Ħadd 28 ta’ Frar jibqgħu magħrufin magħna għal maratona ta’ figolli. Iltqajna fl-4am u bdejna naħdmu l-figolli biex infittxu naħmu l-ewwel fornata fis-7am. Domna għaddejin sat-8pm u l-għada erġajna ltqajna fil-5am u domna sat-8pm naħdmu, naħmu u nżejjnu l-figolli. Kellna diversi nies li ġew jgħinuna; nies li ħadmu l-figolli, d-dulċier Gordon li urina kif għandna nżejjnu (imbagħad Melanie tgħallmet is-sengħa u bdiet tagħmlilna t-taħlita hi!) u oħrajn li offrewlna l-għajnuna tagħhom.

U dak il-ħin stess kif bdejna nagħmluha, l-figolli bdew jinxtraw bir-riħa tfuħ li bdiet ħierġa. Mill-każin stess kien hemm ħafna nies li tawna d-donazzjoni tagħhom u ħadu figolla u dan ir-ritmu mgħaġġel baqa’ għaddej għaliex fit-3 ijiem spiċċawlna l-figolli kollha!

Laqgħa ta' Marzu

Fit-8 ta’ Marzu kellna laqgħa oħra l-Fgura. Din il-laqgħa għamilna evalwazzjoni fuq kif morna fl-ewwel attività kbira li organizzajna: l-figolli. Rajna li kieku organizzajna aktar ruħna u tqassamna aħjar konna ngħajjew ħafna inqas. Dawn il-laqgħat huma importanti biex niċċaraw l-affarijiet bejnietna u naraw kif iffaċjajna l-problemi li nqalgħu u b’hekk nkunu nistgħu nitgħallmu kif ħa niffaċjaw problemi li nistgħu niltaqgħu magħhom l-Etjopja. Kulħadd stqarr kemm kienet emozzjoni kbira u sabiħa tara dawk in-nies kollha lesti biex jgħinu minn qalbhom bir-rieda tagħhom.

14 ta' Marzu 2010 - Car Boot Sale

L-attività li jmiss hija l-car boot sale nhar il-Ħadd 14 ta’ Marzu ir-Razzett tal-Ħbiberija. Din id-darba għamilna roster ta’ kif ħa ninqasmu u mill-esperjenza jidher li ħa nitgħallmu.

Barra minn hekk, il-ħabib tagħna Brandon offra biex jagħmel maratona ta’ 24 siegħa mixi. Kull min irid jipparteċipa f’din il-maratona, li ħa ssir t’April, ħa jagħti donazzjoni ta’ €5. M’hemmx għalfejn tagħmel il-mixja kollha; tista’ anke tagħmel parti minna u tkun qed tagħti sehmek. Minn fuq facebook diġa hemm madwar 80 persuna li kkonfermaw li ħa jagħmlu din il-mixja.

Issetjajna ukoll id-dati li fiha ħa ssir il-Household, jiġifieri għal ġimgħa sħiħa ngħixu flimkien fl-istess dar. Din l-esperjenza għanda tiswilna biex nidraw il-karattri ta’ xulxin, id-difetti li kull wieħed minna għandu u l-burdati ħalli meta nkunu qed ngħixu għal xahar sħiħ flimkien fl-Etjopja nkunu nafu kif għandna nġibu ruħna mingħajr ma noħolqu problemi fi ħdan il-grupp stess u niksru l-ekwilibriju u l-atmosfera tal-esperjenza.

Aktar għajnuna, aktar ideat

Ħbieb tagħna offrew li jagħmlu gigs fejn min ikun qed jattendi jagħti donazzjoni. Ideat oħra spontanji ġejjin minn nies ta’ qalb tajba.

Saħħa u sliem

Henry

Ritratti mill-maratona tal-figolli

Esperjenza mill-isbaħ...diġà

2010-02-20T12:45:00.010+01:00

Ma tistax ma timteliex bil-ferħ, b'enerġija pożittiva u b'entużjażmu meta tesperjenza dak li qed ngħaddu minnhom f'dawn l-aħħar ġranet. Il-ġenerożità li qed inħossu u naraw madwarna minn nies li lanqas biss nafu u li minn jeddhom huma lesti li jgħinuna b'kull mod u kważi, kważi jippruvaw jagħmlulna l-ilma jiżfen, jimlilna qalbna bil-ferħ, iġġegħlek tinsa' d-dwejjaq u l-ħażin li sfortunatament tant nisimgħu fuqu, u timtela b'tama kbira mhux biss għal din l-esperjenza partikolari imma għal ħajja in ġenerali.

Figolli, figolli, figolli!

Bħalissa għaddejin gass mal-pjanċa fuq il-ħidma tal-figolli. Għalhekk bdejna nfittxu l-ingredjenti, l-forom, il-makkinarju u n-nies biex jaħdmu fuqhom. Ovvjament minħabba li dawn huma parti mill-ġbir ta' fondi, ma rridux li jinvolvu spejjeż kbar, l-aktar għax irridu nipproduċu 1000 figolla. Iżda hawnhekk fejn bdejna nesperjenzaw din l-enerġija pożittiva u rieda tajba mingħand ħafna nies, li fi ftit ħin kollox beda jagħqad f'daqqa b'entużjażmu kbir.

Id-Dolceria Primavera offritilna l-post u l-makkinarju biex nagħmlu l-għaġina tal-figolli. Il-Każin ta' Sant Elena, Birkirkara (tal-Bagri) offrilna għajnuna kbira billi tana s-sala tal-każin biex naħdmu fiha kif ukoll kellmilna forn qrib tal-każin biex inkunu nistgħu naħmu l-figolli fihom. Esperjenza sabiħa ħafna kienet meta jiena u Marie Claire morna niltaqgħu man-nies tal-każin biex niftehmu dwar il-loġistika u spiċċajna mdawrin minn numru kbir ta' nies kollha ħerqanin li jtuna l-għajnuna tagħhom. Bdew jistaqsuna x'jonqosna nagħmlu u meta għidnilhom li jonqosna xi ingredjenti, bdew jaraw kif jagħmlu u lil min jafu u li jistgħu isaqsu biex iġibulna dawn l-ingredjenti b'xejn jew bl-aħjar prezz possibli. Kienu nies li kienu lesti jagħmlu wiċċhom għall-għan tagħna ma' kulħadd u kienu lesti jċemplu jew saħansitra jmorru fuq il-post biex isaqsulna dak il-ħin stess. M'hemmx kliem ieħor li bihom nista' niddeskrivi dawn in-nies u din l-esperjenza ħlief tal-għaġeb! Vera nies ta' veru! Ħriġt minn hemmhekk imbellah u kuntent u nħoss li dawn in-nies għallmuni ħafna għaliex nistgħa nifhem li aħna l-voluntiera nkunu lesti biex naħdmu għal din l-esperjenza, imma kienet inkredibbli kif dawn in-nies li mhumiex involuti direttament fl-esperjenza tagħna xorta huma lesti li jagħtu ħinhom u dak kollu li jistgħu għal din l-esperjenza. Ma nafx l-ismijiet ta' dawk in-nies kollha li għinuna u li lesti biex jgħinuna f'dawk it-tlett ijiem bla waqfien (mis-26 sat-28 ta' Frar) li ħa nagħmlu naħdmu fuq il-figolli imma grazzi bil-qalb. Grazzi lil Renald li laqqgħana ma' dawn in-nies u ħadem magħna.

Din kienet l-esperjenza tiegħi u ta' Marie Claire imma l-voluntiera l-oħra għaddew minn esperjenzi simili meta kkuntatjaw nies oħra. Nirringrazzjaw ukoll lil Giormina li pprovdilna d-dqiq u z-zokkor biex isiru l-figolli kif ukoll lin-numru kbir ta' nies li ġabulna xi affarijiet b'xejn biex innaqsu mill-kwantitajiet li rridu nixtru bħal dawk li ġabulna xi kartun tal-bajd jew xi pakketti tal-marġerina. Ma' dawn irridu nirringrazzjaw ukoll lil dawk li diġà ordnaw il-figolli. Komplu sejrin hekk! Għandna iktar figolli xi nbiegħu.

Dan il-miraklu tal-figolli (jekk tippermettuli nsejjaħlu hekk) għadu biss fl-ewwel fażi tiegħu għax jekk nkomplu bir-ritmu li qbadna, meta niġu biex nagħmlu u naħmu dawn il-figolli ħa nesperjenzaw ħafna aktar. Ħerqan biex nara dan kollu jseħħ. Nipprova nirrakuntahulkom fil-blogg li jmiss għalkemm żgur li bil-kliem ma toħroġx il-qawwa kollha tas-sentimenti sbieħ li trabbew ġewwa fina.

Il-frott ta' din l-esperjenza mhuwiex biss l-għajnuna fiżika u materjali li ħa nkunu qed nagħtu fis-sajf. Diġà qed nirċievu ħafna minn din l-esperjenza. L-għajnuna u l-imħabba kbira li qed nesperjenzaw madwarna qed tgħina nikbru flimkien, qed tgħina nagħrfu s-sabiħ li aħna mdawwrin bih u nittama li dan kollu qegħdin ngħadduh lil dawk kollha li qed jaħdmu magħna, jgħinuna u likom ukoll li qed issegwu dan kollu.

Wiċċi għad-dawl

Henry

Insa' d-dieta...ħu figolla...u għinna ngħinu għall-Etjopja!

2010-02-18T15:39:00.006+01:00

Issa li dalwaqt niċċelebraw l-Għid, ħafna minnkom f'dan iż-żmien jixtru jew jagħmlu l-figolli. Din id-darba qed intukom l-opportunità li filwaqt li żżommu din it-tradizzjoni tkunu qegħdin tgħinuna ngħinu.

Ma' donazzjoni ta' €5.50 tingħataw figolla filwaqt li għal donazzjoni t'€10 tingħataw 2 figolli. Tistgħu tħallu l-ordni tagħkom permezz ta' e-mail fuq tosivana2010@gmail.com jew tikkuntatjaw lil Marie Claire jew Romilyn fuq in-numri li jidhru fil-poster.

Grazzi tal-għajnuna tagħkom

Henry

Laqgħa ta' preparazzjoni: 9 ta' Frar 2010

2010-02-11T15:29:00.014+01:00

Darba f'xahar niltaqgħu biex nagħmlu laqgħa biex nippreparaw lilna nfusna għar-realtà li ħa nkunu qed niltaqgħu magħha fl-Etjopja. Għall-laqgħa ta' dan ix-xahar iltqajna f'dar il-Fgura u l-laqgħa kienet immexxija minn Naomi, Clive u Melanie.

Iżda qabel ma bdiet il-laqgħa kellna xi ħaġa sabiħa tistenniena. Marie Claire qassmitilna l-biljetti tal-ajru li ħa nużaw! Meta jkollok dawn l-affarijiet f'idejk din il-ħolma tibda tħossha daqsxejn aktar reali. Kulħadd moħħu fil-biljett issa; nerfugħ f'xi post biex ma jintilifx għax mingħajru ma nagħmlu xejn!!!

Ħa nivvjaġġaw bl-Egypt Air: nitilqu fit-8 t'Awwissu fil-4.45pm u naslu Kajr fit-8.25pm. Imbagħad minn Kajr nitilqu fil-11.15pm u naslu Addis Ababa fit-3.00am! Nagħmlu l-itinerarju bil-kontra biex niġu lura Malta fid-9 ta' Settembru u naslu fl-4pm.

L-Ice breakers.
Bdejna din il-laqgħa permezz ta' ice breaker ħelu mmexxi minn Naomi. L-għaxra li konna għal din il-laqgħa ngħaqadna f'ċirku u kulħadd qabad l-id ta' xi ħadd li ma kienx ħdejh biex iffurmajna għoqda umana! Issa l-bużillis kien li ridna jirnexxilna ninħallu u biex Naomi tagħmililna iktar diffiċli (bħal li kieku ma kinetx diġà!), kellna nagħmlu dan b'għajnejna magħluqa! Tistgħu taħsbu kemm dorna u dorna fuq li dorna biex nippruvaw inħollu din il-kobba iżda dur fuq il-lemin, oħra fuq ix-xellug u aqbeż xi id...u l-għoqda bdiet titgħaqqad iktar minn qabel. Sakemm ma ndunajna li l-għoqda kienet spiċċat żewġ ċrieki u li qatt ma konna ħa niġu ċirku wieħed! Miskina Ann! Kienet ilha tgħidilna ma nafx kemm b'din is-sitwazzjoni imma bl-entużjażmu biex ninħallu, bid-daħk u bl-istorbju ma konniex qed nagħtu kasha! Skużana Ann!

Wara Clive għamlilna eżerċizzju ieħor. Naħseb meta kontu żgħar ġieli lgħabtu l-logħba tat-telefon; wieħed jgħaddi l-messaġġ f'widnejn ta' ħdejh, dan jirrepetih lil ta' warajh sakemm ma l-aħħar wieħed jgħid x'kien il-messaġġ u naraw kemm inbidel mill-oriġinal. Iżda Clive varja ftit din il-logħba. Kull wieħed minnha kellu tazza bl-ilma u l-messaġġ kellna ngħadduh bl-ilma f'ħalqna! Ma naħsibx li għandi għaliex nispjega x'ġara. Il-vidjow t'hawn taħt juri lil Natalie tipprova tgħaddi l-messaġġ lil Manwel. Iġġudikaw intom kienx suċċess jew le.

L-aħħar eżerċizzju mexxietu Melanie. Tatna din is-sitwazzjoni biex naħdmu fuqha. Qassmitna f'żewġ gruppi taparsi żewġ familji Etjopjani.

L-ewwel familja
Din kienet magħmula mill-missier li jaħdem ta' bidwi, li jagħmel il-birra u jrabbi t-tiġieġ u li għandu 5 t'itfal. Dan il-missier jaqla madwar 13-il birr fix-xahar iżda m'hemm l-ebda garanzija li x-xahar ta' wara ħa jaqla' l-istess paga. (Birr hija l-munita Etjopjana. 13-il birr hija ekwivalenti għal Ewro.)

It-tieni familja
Din kienet magħmula minn aħwa biss għax il-ġenituri kienu mietu. L-aħwa kienu jiddependu mit-tifel il-kbir li jaħdem t'għalliem fi skola Kattolika u jaqla' 50 birr fix-xahar.

Melanie poġġiet fuq mejda prodotti immarkati bi prezzijiet kemm jista' jkun reali f'supermarket Etjopjan. Xi ftit mill-affarijiet u l-prezzijiet tagħhom kienu dawn:
ċereali - 50 birr
luminata - 10 birr
ħobża - 2 birr
patata - 3 birr
tadam - 9 birr
faħam - 50 birr
gallettini - 45 birr

Kellna nagħżlu x'ħa nixtru b'dik il-paga ta' xahar. Biex tkompli tgħaqad l-ewwel familja indunat li l-missier marad bil-malarja u l-mediċina għalija tiswa' 45 birr. Dan kien ifisser li jekk riedu jixtru din il-mediċina kellhom ifaddlu aktar minn 3 xhur paga bil-konsegwenza li ma jixtru xejn għal 3 xhur...tista' tgħid l-għażla spiċċat bejn li jmut il-missier biss jew tmut il-familja kollha biex jippruvaw isalvaw il-missier. It-tieni familja saret taf li għandhom ħuhom ieħor jgħix fil-kampanja u t-tifel il-kbir iddeċieda li jbiegħ id-dar ta' ħuhom, jaqla' 200 birr u jpoġġi lil ħuhom f'orfanatrofju.

Dawn is-sitwazzjonijiet pinġewlna b'mod iktar ċar is-sitwazzjoni fl-Etjopja. Fid-diskursata li kellna wara ħareġ il-fatt li dawn in-nies iridu biss jgħixu l-preżent - jekk ma jgħixux ġurnata b'ġurnata taħkimhom dik is-sensazzjoni t'inkapaċita. Pjanijiet għall-futur ftit li xejn setgħu jagħmlu.

Dawn l-episodji, flimkien m'oħrajn li rrakontawlna nies bħal Manwel u Melanie (li diġà għamlu xogħol volontarju fl-Etjopja) ikomplu jgħinuna naħsbu aktar dwar ir-realtà li ħa niffaċjaw u l-għajnuna kbira li hemm bżonn f'dan il-pajjiż.

Il-Logo F'din il-laqgħa ġie ppreżentat ukoll il-logo tal-grupp Towards our Sivana. Il-logo sar minn Manuel Cassar u juri 4 biċċiet ta' Jigsaw Puzzle; 3 minnhom huma bil-kuluri tal-bandiera Etjopjana filwaqt li l-parti li mhijiex imweħħla hija bajda. Malli tgħaqqada mal-parti l-ħamra tifforma l-bandiera Maltija. Prosit Manuel! (Tistgħu taraw il-logo fil-bidu ta' dan il-blogg.

Avvenimenti li ġejjin
Il-biċċa xogħol kbira li jmiss hija l-ġbir ta' fondi permezz tal-bejgħ tal-figolli. Għalhekk iddeċidejna li s-27 u t-28 ta' Frar huma d-dati li fihom ħa naħdmu fuq dawn il-figolli bl-għajnuna ta' ħafna nies. (Aktar dettalji u kif tistgħu tagħtu l-kontribut tagħkom jingħataw dalwaqt.)

Naomi ħarġet bl-idea li jsir car-boot sale. Dan huwa ppjanat li jsir fl-14 ta' Marzu 2010 ir-Razzett tal-Ħbiberija.

(Wara mix-xellug għall-lemin) Amanda, Clive u Manwel, (Quddiem mix-xellug għall-lemin) Melanie, Ann, Natalie, Naomi, Daniela, Marie Claire u Henry. (Nieqsa mir-ritratt: Manuel Cassar, Louise u Romilyn)

Saħħa u sliem

Henry

Uġigħ ta' ras - ġbir ta' fondi!

2010-02-02T09:44:00.014+01:00

Hawn Malta bbumbardjati bi ġbir ta' fondi. U mingħajr ma tagħti tort lil ħadd kulħadd jibda jikkummenta "imma kemm ħa ndum nagħti". Għalhekk kull meta ffurmajt parti minn xi xogħol volontarju, l-iktar biċċa li kienet tbeżżagħni u l-inqas li nkun qed nistenna hija meta rridu niġbru l-fondi!

Kif ħa jirnexxilna nikkonvinċu ħafna nies biex għal darba oħra jerġgħu jdaħħlu idejhom fil-but u din id-darba jagħtu għal kawża li qed naħdmu għaliha aħna?

Dawn mhux ħa jibagħtuna nixxejru u jgħidulna li diġà taw u li issa mhux ħa jagħtu aktar?

U speċjalment nibża meta nitkellem man-nies, ngħidilhom li ħa mmur nagħmel xogħol volontarju fl-Etjopja u jgħiduli x'sejjer tagħmel barra meta nista' ngħin Malta stess.

Dawn il-kummenti kollha jġegħluni naħseb u ninkwieta li mhux biss dak li telgħin nagħmlu fl-Etjopja ma jirnexxilniex nagħmluh għax ma jkollniex fondi biżżejjed iżda ukoll li dak li nemmnu fih m'aħniex jirnexxilna nwassluh lin-nies. Għax aktar importanti milli kemm niġbru flus (li jiġi merħba bih u nipprova naħdmu bih...Malta qatt ma rrifjutat qamħ...u naħseb lanqas l-Etjopja) huwa l-kuxjenza li nistgħu nqajmu.

Aħna ċittadini Maltin iżda nappertjenu lid-dinja (jekk tippermettuli nikkwota lil Madre Tereża). Għalkemm ħa mmorru nagħmlu xogħol barra minn Malta ħafna minna diġà għamlu jew jagħmlu matul is-sena xogħol volontarju f'Malta stess għal Maltin. Xi membri mill-grupp huma parti mill-Youth Fellowship. Oħrajn organizzaw attivitajiet għal persuni b'diżabilità, xi membri huma parti miċ-ĊAMyouths filwaqt li membri tal-grupp kienu l-fundaturi tal-grupp Prisms. Inħossu li aħna pajjiż ixxurtjat li, bin-nuqqasijiet kollha tiegħu, l-affarijiet essenzjali bħal ilma, elettriku u edukazzjoni jinsabu hemm għal kulħadd. Għalhekk inħossu li aħna nistgħu nagħtu sehmna ukoll billi nkomplu nibnu ma' dak li bdew il-Living Waters fis-snin imgħoddija.

Fost il-proġetti li saru kien hemm il-bini ta’ djar b’livell tajjeb t’iġjene għal nies li lanqas kellhom saqaf fuq rashom, proġett li wassal ilma tajjeb għax-xorb minħabba li dan in-nuqqas ta’ ilma kien il-kawża ta’ ħafna mard u mwiet fost il-poplu Etjopjan, bini u rranġar ta’ skejjel biex jitjieb il-livell tal-edukazzjoni u b’hekk dan il-poplu jkun jista’ jgħin lilu nnifsu jimxi l-quddiem kif ukoll tqassim ta’ mediċina essenzjali, nieqsa f’dan il-pajjiż li twassal biex ċertu mard li jista’ jiġi kkontrollat jinfirex xorta waħda.

Minħabba li jien u Romilyn naħdmu bħala għalliema fl-istess skola, ħsibna li norganizzaw xi attivitajiet għall-istudenti tagħna. L-għan wara dawn l-attivitajiet mhuwiex biss li niġbru xi flus biex ngħinu lil kawża tagħna imma ukoll li fost l-istudenti li ngħallmu ndaħħlu l-mentalità t'altruwiżmu u li jkunu konxji tal-qagħda tad-dinja madwarhom. Jekk wieħed iħares biss madwaru jibqa' b'mentalità iżolana, magħluqa u tirriskja li tistagħġna bħal għadira bl-ilma qiegħed. Imma jekk nitfgħu ħarsitna l-bogħod nwessgħu l-orizzonti tagħna u niżviluppaw mentalità aktar wiesgħa.

Għalhekk ħa norganizzaw jumejn attivitajiet fid-9 u l-10 ta' Marzu b'logħob bħal Human Table-Soccer, Gladiator u Bungee-Run. Nittamaw li jkollna l-għajnuna kollha li jkollna bżonn għal attività bħal din għaliex ikollna bżonn ħafna nies. Barra minn hekk ma rridux intellfu min attivitajiet oħra li jsiru fl-iskola għall-għaqdiet oħrajn għax kulħadd bżonn l-għajnuna u b'hekk nirriskjaw li waħda ttellef lil oħra.

Irridu nilħqu bilanċ.

F'kollox u f'kullimkien.

Henry

Merħba!

2010-01-17T18:15:00.004+01:00

Minn meta ngħaqadna u bdejna niffurmaw l-ewwel ideat sal-lum diġa għaddew 5 xhur. Issa fadlilna ftit inqas minn 7 xhur oħra u nkunu fi triqitna lejn l-Etjopja biex dak li ilna naħsbu fuqu u naħdmu għalih inkunu nistgħu nibdew inwettquh fil-prattikà.

Il-grupp Towards Our Sivana ngħaqad fis-Sajf tal-2009 b'xewqa komuni, dik li mmorru nagħmlu xi xogħol volontarju fl-Afrika. 13-il persuna li ġejjin minn oqsma differenti tal-ħajja. M'aħniex xi qaddisin...iżda ħassejna li aħna xxurtjati biżżejjed biex nistgħu nagħtu xi ħaġa lura. U b'hekk bdiet il-ħolma tal-Etjopja. Ikkuntatjajna lil Living Waters li issa ilhom snin jagħmlu xogħol volontarju fl-Etjopja u dawn aċċettawna u qasmu magħna din il-ħolma.

Dan il-blogg nixtiequh ikun id-djarju online tagħna biex l-esperjenza ma tibqax tagħna biss. Hawnhekk ħa ngħidu xi preparamenti qed nagħmlu għas-sajf li ġej, il-volontarji jniżlu il-ħsibijiet li jgħaddu minnhom, xi problemi li nistgħu niltaqgħu magħhom, kif ukoll ħa nkunu qed inħabbru avvenimenti li nkunu ħa norganizzaw. Tkunu tistgħu ssegwu l-passi tagħna.

IL-VIDJOW!
Ilbieraħ ippreparajna l-vidjow li bih ħa nibdew inwasslu l-messaġġ u l-għanijiet tagħna. Għaddejna żmien sabiħ flimkien fejn kulħadd beda joħroġ bl-ideat kif nistgħu nkunu oriġinali, ma ntawlux iżżejjed iżda fl-istess ħin jasal il-messaġġ li rridu nwasslu. Kif tistgħu taħsbu meta jkollok ħafna nies jaħdmu fuq ħaġa waħda u kulħadd jagħti l-ideat tiegħu ndumu biex niddeċiedu u filfatt għamilna 5 siegħat sakemm ma lestejna l-filming! Imbagħad kien fadal l-editing! Ilbieraħ sirt naf xi jħossu dawk l-atturi u producers li jdumu jaħdmu siegħat sħaħ biex jagħmlu film u mbagħad dan ikun twil xi siegħa u nofs biss. Aħna hekk ġralna. Għamilna 5 siegħat biex ħloqna vidjow ta' minuta u nofs. Iżda l-prodott finali għoġobni. Tista' tara l-vidjow f'dan il-link.

Għalissa daqshekk. Aktar ħsibijiet u informazzjoni ngħadduhom darba oħra. Nittama li tibdew issegwu dan il-blogg u tikkumentaw il-ħsibijiet tagħkom ukoll.

Saħħa u sliem

Henry